Ane paling puruha jani sirahne sing ada lenan tuah Tuhan YME/Ida Sanghayng Widhi/Allah/sakancan titel Sesuhunan ane lenan.
Puruh sawireh sasai kena obat-abit. Mara ada linuh dija-dija, tanah longsor, ujan angin, prajani liu ane ngorahang Tuhan sedang murka. Karena Widi-ne darah tinggi tur demen ngamuk ngawag-ngawag. Yen Widi-ne darah tinggi sinah ba liu pidan kena stroke ningalin polah-solah jlemane ane tidong-tidong. yen Widi-ne seken demen ngamuk sinah ba liu sajan jleme ane mati; sakancan koruptor, penjahat, wisyan gumi, anggona DPR bungut bengu, pejabat jele goba jele ati, tur sinetron ane sing mendidik sinah ba bangka konyangan.
Mara ada kereta api tabrakan, kapal kelem, bis macaplagan, jeg prajani liunan ngorahang to krana takdir Tuhan. Kadena Widi-ne ane nyetir ngebut sambilangan mecik-mecik HP nge-sms Jamu Pingin (Janda Muda Kesepian - Kedinginan), karena Widi-ne ane saru-saru nilep pis gumi kanti sing ada pis anggo menahin rel kereta api, kadena Widi-ne ane mark up proyek kanti jalane jebol dini-ngonjol-ditu.
Mula aluhan yen mengkeb durin takdir, yen Widi orahin nyemak tanggung jawab, tinimbang ngakuin ibane mula sing pantes dadi sopir, sing becus dadi pejabat, sing bisa nyemak gae apa.
Jani nyangetang puruh Tuhan Allah-e sawireh konyangan sibuk ngered-ngered adane.
Jendral ane dicurigai nerima pipis panes (maksudne pis ane ngae peluhe mecrecekan) bersumpah atas nama Tuhan sing taen kena suap.
Jendral ane meriksa cecek-cecek, siap mempertanggungjawabkan ken Tuhan kasus totonan bukan rekayasa.
Tuhan ane sing taen maan duman pis payu anggona jaminan kesucian.
Kadena yen ba ngaba adane Tuhan jeg langsung ba kramane lakar percaya. KAdena yen misi ngeling sigsigan kramane langsung medalem. Sing tawanga kramane ba celih. Yen ane ngeling buaya kesimpulane tuah abesik: air matane sinah air mata buaya.
Ulesne, para pejabat lan jendrale demen ngered adan Tuhan, demen masumpah atas nama Tuhan sawireh aluhan lan lebih aman ngered adan Tuhan bandingang ken ngedengang bukti ane lenan.
Lebih aman sawireh Sanghyang Widi sing mungkin tedun ka jagate lantas ngalaporang jenderal to ka kantor polisi atas kasus pencemaran nama baik Tuhan.
Yen seken Tuhan bani ngalaporang jenderal polisi ka kantor polisi pamuputne bisa Tuhan ane malah kadadiang tersangka tunr entungange ka sel ken polisine.
Lebih aluh sawireh yen bersumpah ane perluanga tuah mesuang munyi dogen. Sing perlu ngedengang daftar kekayaan, sing perlu ngemang tim independen ijin meriksa umah, tanah lan garasine.
Lebih aluh sawireh yen ba ngaba adan Tuhan artine ba sing perlu ngaba bukti lenan.
Nang jani orahin para pejabate ane demen ngered-ngered adan Tuhan apang suud bersumpah, apang suud mapeta lan ngemang penjelasan ka rakyat nguda garasine bisa lima misi mobil, nguda depositone madugdug, nguda umah gedongne ada tatelu, asli lakar ngetor entudne.
Sumpah atas nama Tuhan to sing ada ajine yen ane masumpuh sing nau ken Widi wiren sasai ngulurin momo padidi.
sumber: Bali Post ed. Minggu Paing, 15 November 2009
| Comments |
|
